Симеон ПолоцкийИзбранные сочинения
Подготовка текста, статья и комментарии И. П. Еремина
ВЕРТОГРАД МНОГОЦВѢТНЫЙ
Титульный лист „Вертограда“.
Рукопись Московского Гос. исторического музея, Синод, собр., № 288, л. 1.
КУПЕЦТВО
Чин купецкий без грѣха едва может быти,
на многи бо я злобы враг обыче лстити;
Изряднѣе лакомство в купцѣх обитает,
еже в многия грѣхи оны убѣждает.
5 Во-первых, всякий купец усердно желает,
малоцѣнно да купит, драго да продает.
Грѣх же есть велий драгость велию творити,
малый прибыток лѣть есть без грѣха строити.
Вторый грѣх в купцѣх часто есть лживое слово,
10 еже ближняго в вещех прелстити готово.
Третий есть клятва во лжу, а та умноженна,
паче песка на брезѣ морстем положенна.
Четвертый грѣх татбою излише бывает,
таже в мирѣ в мѣрилѣх часто ся свершает, —
15 Ибо они купуют во мѣру велику,
а внегда продаяти, ставят не толику.
Инии, аще мѣру и праву имѣют,
но не право мѣрити вся вещы умѣют.
Инии хитростию вещы отягчают,
20 мочаще я, нѣции худыя мѣшают.
А вся сия без грѣха немощна суть быти,
яко бог возбраняет сих лукавств творити.
Пятый есть грѣх: нѣции лихоимства дѣют,
егда цѣну болшити за время умѣют;
25 Елма бо мзды чрез время нѣко ожидают,
тогда цѣну вящшую в куплях поставляют.
Шестый грѣх, егда куплю являют благую,
потом лестно ставляют ину вещь худую.
Седмый грѣх, яко порок вещы сокрывают,
30 вещь худую за добру купующым дают.
Осмый, — яко темная мѣста устрояют,
да худыми куплями ближния прелщают,
Да во темности порок купли не узрится
и тако давый сребро в купли да прелстится.
35 О сынове тмы люты! Что сия творите?
Летяще ближния вашы, сами ся морите.
В тму кромешную за тму будете ввержени,
от света присносущна вѣчно отлучени!
Отложите дѣла тмы, во свѣтѣ ходите,
40 да взидете на небо, небесно живите.
Черновой автограф стихотворения „Купецтво“.
Рукопись Московского Гос. исторического музея, Синод, собр., № 659, л. 317 об,.
МОНАХ
Монаху подобает в келии сѣдѣти,
во постѣ молитися, нищету терпѣти,
Искушения врагов силно побѣждати
и похоти плотския труды умерщвляти, —
5 Аще хощет в небеси мзду вѣчную взяти,
неоскудным богатством преобиловати.
Пагубно же оному по градѣ ходити,
из едина в другий дом преходяще пити.
Но увы безчиния! Благ чин погубися,
10 иночество в безчинство в многих преложися.
О честных нѣсть здѣ слово: тыя почитаю,
безчинныя точию с плачем обличаю.
Не толико миряне чреву работают,
елико то монаси поят, насыщают.
15 Постное избравший житие водити
на то устремишася, да бы ясти, пити, —
Тоже не поелику есть во славу бога,
но излише, даже скорбь раждается многа.
Скорбь чреву, болѣзнь главѣ, а ум изчезает,
20 тако постник не знает, еже содѣвает.
Множицею есть зрѣти по стогнам лежащих,
изблевавших питие и на свѣт не зрящих,
Мнози колесницами возими бывают,
полма мертвии суще, народ соблазняют.
25 Мнози от вина буи сквернословят зѣло,
лают, клевещут, срамят и честныя смѣло,
А за то во утрий день без казни бывают,
яко без обителей в градѣ ся скитают.
Нѣции постригшися посестры питают
30 неправым собранием и с нѣми бывают.
Инии тайно от поп в струзѣх пострижени
ходят, лстяще мир, аки на то устроени.
Мнози не стрижении монашеско ходят,
безчинными дѣлесы соблазнь в мирѣ родят.
35 Оле развращения! Ах, соблазнь велика!
Како стерпѣти может небесе владыка!
В одеждах овчих волци хищнии бывают,
чреву работающе, духом погибают.
Узриши еще в ризы красны облеченны,
40 иже во убожество полное стрижени.
Ни жених иный тако себе украшает,
яко инок несмыслный, — за что погибает,
Ибо мысль его часто — да от жен любится;
под красными ризами — увы! — дух сквернится.
45 Таковии ко женам дерзают ходити,
дружество приимати, ясти же и пити.
Сродство себѣ с онѣми ложнѣ повѣдают,
или тетки, матери, сестры нарицают;
Под ними же имены хотят мужи быти,
50 без брачнаго союза зол брак сотворити.
О, безчиния люта! Оставлше сродныя,
притворяют сродники себѣ неправыя,
Имже дѣлом от Христа себе удаляют,
суща жениха своих душ пренебрегают,
55 За что, яко блудници, будут отлучени,
аще не обратятся, и вѣчно казнени.
Престаните, иноцы, сия зла творити,
тщитеся древним отцем святым точни быти, —
Да идѣже они суть во вѣчной радости,
во будете им общници присныя сладости!
ГРАЖДАНСТВО
Како гражданство преблаго бывает,
гражданствующым знати подобает.
Разная седми мудрых суть мнѣния,
но вся виновна граждан спасения.
5 Премудрый Виас даде слово свое,
гражданство быти преизрядно тое,
В нем же закона, як царя, боятся
и царя, яко закона, страшатся.
Хилон блажит, гдѣ законов слушают,
10 велесловных же ритор не глашают.
Клеопул паки той град похваляет,
гдѣ безчестия всяк ся устрашает
Гражданин паче закона самаго,
на преступники в книгах писаннаго.
15 Периандер же то славит гражданство,
в нем же всѣм прочим, имущым равенство,
Добродѣтелми зовутся лучшая
и наричутся злобы вся хуждшая.
Питтак похвалу дает граду тому,
20 в нем же началство не дается злому.
Фалес град блажит, гдѣ граждане мнози
ни пребогати, ни зѣло убози.
Солону град люб, в нем же обид творцы
вся равно имут праведныя борцы,
25 Не токмо бѣду от них страдавшыя,
но ни едины тщеты познавшыя;
Еще — идѣже блазии блажатся,
честь приемлюще, злии же казнятся;
Еще — и в нем же граждане слушают
30 началных, — сии закон почитают.
Сия суть, яже крѣпят государства,
чинна и славна содѣвают царства.
НАЧАЛНИК
1
Пастыр с овцами образ предлагает,
как нам жити в мирѣ подобает.
Пастыр началны знаменует люди;
стадо подданых во образ нам буди.
5 Егда же пастырь стадо присѣщает,
овца на пути не лежит, но встает,
Аки честь ему хотящи творити;
таков к началным подначалный быти
Выну да тщится, сирѣчь да говѣет,
10 яко же овца, елико умѣет,
И яко мѣсто божие держаща,
о безбѣдствии подначалных бдяща.
Взаим же пастыр овцы соблюдает
и на рамах си блудныя ношает;
15 Тако началник должен есть творити,
бремя подданых крѣпостно носити,
Не презирати и за псы имѣти,
паче любити, яко своя дѣти,
И то в памяти выну содержати,
20 яко земля тѣх и его есть мати.
Паче овчата пастырска боятся
жезла и свиста едина страшатся;
Подначалници страх должни началным,
о их цѣлости по вся дни печалным;
25 Тѣм и апостол к страху увѣщает
и мечем острым началных прещает.
Пастырь же жезлом укрощает стада,
женет на паству, женет и внутрь града;
Тако началник жезлом да управит,
30 винна накажет, невѣжду наставит, —
Обаче косен да будет язвити,
идѣже довлѣ есть токмо страшити.
Еще глас пастырск овцы добрѣ знают
и того выну прилѣжно слушают:
35 Шествуют тамо, аможе глашает,
едина другу в слѣд его варяет;
То поддании должни суть хранити,
гласу началных послушливи быти:
Всякая душа властем да бывает
40 богопокорна, — Павел увѣщает.
Пастыри взаим пред овцами ходят,
овцы на паству благую возводят;
Сице началных долг есть предходити
стаду подданых, на пажит водити
45 Здраву, спасенну, божию канону,
ниже гражданску противну закону;
Образ да будут себѣ подчиненным,
еже ходити путем божественным.
К сим овцы млеком пастыря питают
50 и на одежды волну свою дают;
Поддании же долг свой да воздают,
господы своя хлѣбом да питают;
И ины нужды должни исполняти,
не ропчюще же, но во благодати.
55 А яко пастыр от волк защищает,
во дни и в нощи мало усыпает,
Егда же стрижет волну, а не тѣло
живое рѣжет, то бо хранит цѣло
И кожу блюдет, да не повредится,
60 да паки стрищи волну прилучится, —
Тако державци должни снабдѣвати,
подданыя си от враг защищати;
И егда даже от онѣх взимают,
долг свой да вземлют, а не изкожают, —
65 Да и впред мощно будет постригати,
дань, яко волну, праведно взимати.
Но оле времен развращенных зѣло!
Рѣжут днесь волну, и кожу, и тѣло.
Сам, врачю вышний, изволь исцѣляти,
70 скудости бѣдных людей исполняти,
Да твою милость выну прославляют,
в звании своем честно пребывают.
2
Блаженна страна и град той блаженный,
в них же началник благий поставленный,
Горе же граду и странѣ бывает,
юже началник не благ управляет;
5 Гнѣв тамо божий, гдѣ начало злое,
милость тогожде, идѣже благое.
Да будет же благ, должен есть хранити,
яже аз хощу сим словом явити.
Перва начална сия добродѣтель, —
10 благочестия да будет хранитель,
С благодарствием о всѣх богом данных,
сану приличных, многими желанных.
Живущ же тако, богом снабдѣваем
бывает, правим, от бѣдств защищаем;
15 И яко бога он выну говѣет,
от подначалных точну честь имѣет.
Вторая сану началных прилична
есть добродѣтель, в мирѣ не обычна:
Та смирение есть божественное,
20 Христом господем в конец храненное;
Имать началник в памяти держати,
яко не в вѣки будет обладати;
Смерть бо пришедши хочет власть отяти,
с прочими людми во персти сравняти.
25 Третия властей добротворение,
еже хранити им разсуждение
Во всяких дѣлѣх, а не уповати
на един свой ум, выну вопрошати
Умных совѣта: тако бо вершити
30 благо вся мощно, а не грѣшити.
Очеса лучше видят, неже око,
никто о себѣ да держит высоко;
В мнозѣ совѣтѣ есть спасение,
в едином умѣ поползновение.
35 Четвертая есть добродѣтель властей:
правду хранити, блюсти от напастей
Подчиненныя и чести даяти
достойным, а не на злато смотряти;
Равно судити мала и велика
40 на лице зрящым прещает владыка.
Не яко сѣть им закон да бывает,
юже не крѣпку паук соплѣтает;
Та бо животно мало уловляет,
болшее — сѣти самыя терзает.
45 Не суди тако, но един суд буди
всѣм, иже в едной суть области люди.
Пятая — крѣпость прилична владущым,
не склонным быти к прелесть глаголющым,
Ниже златыми вериги влеченным
50 быти, ни другов прошенми прелщенным.
Шестая — кротость и приступность буди,
за ню же господь возлюбит и люди,
Яко Мойсея кротка бог любяше
и во всѣх нуждах ему помогаше.