и врагов моих о мне. Господи Боже мой, воззвах к тебе, и исцелил мя eси. Господи, возвел eси от ада душу мою, спасл мя eси от низходящих в ров. Пойте Господеви, преподобнiи eго, и исповедайте память святыни eго; яко гнев в ярости eго, и живот в воли eго; вечер водворится плачь, и заутра радость. Аз же рех во oбилiи моем; не подвижуся во век. Господи, волею твоею подаждь доброте моей силу; отвратил же eси лице твое, и бых смущен. К тебе, Господи, воззову, и к Богу моему помолюся. Кая польза в крови моей, внегда сходити ми во истленiе? eда исповестся тебе персть? или возвестит истину твою? Слыша Господь и помилова мя; Господь бысть помощник мой. Обратил eси плачь мой в радость мне, растерзал eси вретище мое и препоясал мя eси веселiем, яко да воспоет тебе слава моя, и не умилюся. Господи Боже мой, во век исповемся тебе.
Псалом 30.
На тя, Господи, уповах, да не постыжуся во век; правдою твоею избави мя и изми мя. Приклони ко мне ухо твое, ускори изяти мя; буди ми в Бога защитителя и в дом прибежища, eже спасти мя. Яко держава моя и прибежище мое eси ты; и имене твоего ради наставиши мя и препитаеши мя. Изведеши мя от сети сея, юже скрыша ми; яко ты eси защититель мой, Господи. В руце твои предложу дух мой; избавил мя eси, Господи Боже истины. Возненавидел eси хранящыя суeты вотще; аз же на Господа уповах. Возрадуюся и возвеселюся о милости твоей, яко призрел eси на смиренiе мое, спасл eси от нужд душу мою и неси мене затворил в руках вражiих, поставил eси на пространне нозе мои. Помилуй мя, Господи, яко скорблю; смятеся яростiю oко мое, душа моя и утроба моя. Яко исчезе в болезни живот мой, и лета моя в воздыханiих; изнеможе нищетою крепость моя, и кости моя смятошася. От всех враг моих бых поношенiе, и соседом моим зело, и страх знаeмым моим; видящiи мя вон бежаша от менe. Забвен бых яко мертв от сердца; бых яко сосуд погублен. Яко слышах укоренiе многих живущих окрест; внегда собратися им вкупе на мя, прiяти душу мою совещаша. Аз же на тя, Господи, уповах, рех; ты eси Бог мой. В руку твоeю жрeбiи мои; избави мя из руки враг моих и от гонящих мя. Просвети лице твое на раба твоего; спаси мя милостiю твоею. Господи, да не постыжуся, яко призвах тя; да постыдятся нечестивiи, и снидут во ад. Немы да будут устны льстивыя, глаголющыя на праведнаго беззаконiе, гордынею и уничиженiем. Коль многое множество благости твоея, Господи, юже скрыл eси боящымся тебe, соделал eси уповающым на тя, пред сыны человеческими; скрыеши их в тайне лица твоего от мятежа человеческа, покрыеши их в крове от пререканiя язык. Благословен Господь, яко удиви милость свою во граде огражденiя. Аз же рех во изступленiи моем; отвержен eсмь от лица oчiю твоeю; сего ради услышал eси глас молитвы моея, внегда воззвах к тебе. Возлюбите Господа, вси преподобнiи eго; яко истины взыскает Господь и воздает излише творящым гордыню. Мужайтеся, и да крепится сердце ваше, вси уповающiи на Господа.
Псалом 31.
Блажени, ихже оставишася беззаконiя, и ихже прикрышася греси. Блажен муж, eмуже не вменит Господь греха, ниже eсть во устех eго лесть. Яко умолчах, обетшаша кости моя, от eже звати ми весь день, яко день и нощь отяготе на мне рука твоя; возвратихся на страсть, eгда унзе ми терн. Беззаконiе мое познах и греха моего не покрых, рех; исповем на мя беззаконiе мое Господеви; и ты оставил eси нечестiе сердца моего. За то помолится к тебе всяк преподобный во время благопотребно; oбаче в потопе вод многих к нему не приближатся. Ты eси прибежище мое от скорби обдержащiя мя; радосте моя, избави мя от обышедших мя. Вразумлю тя, и наставлю тя на путь сей, в oньже пойдеши; утвержу на тя oчи мои. Не будите яко конь и меск, имже несть разума; броздами и уздою чeлюсти их востягнеши, не приближающихся к тебе. Многи раны грешному; уповающаго же на Господа милость обыдет. Веселитеся о Господе и радуйтеся праведнiи, и хвалитеся, вси правiи сердцем.
Псалом 32.
Радуйтеся, праведнiи, о Господе; правым подобает похвала. Исповедайтеся Господеви в гуслех, во псалтири десятоструннем пойте eму; воспойте eму песнь нову, добре пойте eму со восклицанiем; яко право слово Господне, и вся дела eго в вере. Любит милостыню и суд Господь, милости Господни исполнь земля. Словом Господним небеса утвердишася, и дхом уст eго вся сила их; собираяй яко мех воды морскiя, полагаяй в сокровищих бездны. Да убоится Господа вся земля, от негоже да подвижутся вси живущiи по вселенней; яко той рече, и быша; той повеле, и создашася. Господь разоряет советы языков, отметает же мысли людiй и отметает советы князей. Совет же Господень во век пребывает, помышлeнiя сердца eго в род и род. Блажен язык, eмуже eсть Господь Бог eго, людiе, яже избра в наследiе себе. С небесе призре Господь, виде вся сыны человечeскiя; от готоваго жилища своего призре на вся живущыя на земли; создавый на eдине сердца их, разумеваяй на вся дела их. Не спасается царь многою силою, и исполин не спасется множеством крепости своея. Ложь конь во спасенiе, во множестве же силы своея не спасется. Се, oчи Господни на боящыяся eго, уповающыя на милость eго; избавити от смерти душы их, и препитати я в глад. Душа же наша чает Господа, яко помощник и защититель наш eсть; яко о нем возвеселится сердце наше, и во имя святое eго уповахом. Буди, Господи, милость твоя на нас, якоже уповахом на тя.
Псалом 33.
Благословлю Господа на всякое время, выну хвала eго во устех моих. О Господе похвалится душа моя; да услышат кротцыи и возвеселятся. Возвеличите Господа со мною, и вознесем имя eго вкупе. Взысках Господа, и услыша мя и от всех скорбей моих избави мя. Приступите к нему и просветитеся, и лица ваша не постыдятся. Сей нищiй воззва, и Господь услыша и, и от всех скорбей eго спасе и. Ополчится ангел Господень окрест боящихся eго и избавит их. Вкусите и видите, яко благ Господь; блажен муж, иже уповает нань. Бойтеся Господа, вси святiи eго, яко несть лишенiя боящымся eго. Богатiи обнищаша и взалкаша; взыскающiи же Господа не лишатся всякаго блага. Прiидите, чада, послушайте менe, страху Господню научу вас. Кто eсть человек хотяй живот, любяй дни видети благи? Удержи язык твой от зла и устне твои, eже не глаголати льсти. Уклонися от зла и сотвори благо; взыщи мира и пожени и. Oчи Господни на праведныя, и уши eго в молитву их. Лице же Господне на творящыя злая, eже потребити от земли память их. Воззваша праведнiи, и Господь услыша их и от всех скорбей их избави их. Близ Господь сокрушенных сердцем, и смирeнныя духом спасет. Многи скорби праведным, и от всех их избавит я Господь. Хранит Господь вся кости их, ни eдина от них сокрушится. Смерть грешников люта, и ненавидящiи праведнаго прегрешат. Избавит Господь душы раб своих, и не прегрешат вси уповающiи на него.
Псалом 34.
Суди, Господи, обидящыя мя, побори борющыя мя. Прiими oружiе и щит и востани в помощь мою; изсуни мечь и заключи сопротив гонящих мя; рцы души моей; спасенiе твое eсмь аз. Да постыдятся и посрамятся ищущiи душу мою, да возвратятся вспять и постыдятся мыслящiи ми злая. Да будут яко прах пред лицем ветра, и ангел Господень оскорбляя их; да будет путь их тма и ползок, и ангел Господень погоняяй их; яко туне скрыша ми пагубу сети своея, всуе поносиша души моей. Да прiидет eму сеть, юже не весть, и ловитва, юже скры, да обымет и, и в сеть да впадет в ню. Душа же моя возрадуется о Господе, возвеселится о спасенiи eго. Вся кости моя рекут; Господи, Господи, кто подобен тебе? избавляяй нища из руки крепльших eго, и нища, и убога от расхищающих eго. Воставше на мя свидетелe неправеднiи, яже не ведях, вопрошаху мя. Воздаша ми лукавая воз благая, и безчадiе души моей. Аз же, внегда oни стужаху ми, облачахся во вретище и смирях постом душу мою, и молитва моя в недро мое возвратится. Яко ближнему, яко брату нашему, тако угождах; яко плачя и сетуя, тако смиряхся. И на мя возвеселишася и собрашася; собрашася на мя раны, и не познах; разделишася, и не умилишася. Искусиша мя, подражниша мя подражненiем, поскрежеташа на мя зубы своими. Господи, когда узриши? устрой душу мою от злодейства их, от лeв eдинородную мою. Исповемся тебе в церкви мнозе, в людех тяжцех восхвалю тя. Да не возрадуются о мне враждующiи ми неправедно, ненавидящiи мя туне и помизающiи oчима; яко мне убо мирная глаголаху, и на гнев лeсти помышляху. Разшириша на мя уста своя, реша; благоже, благоже, видеша oчи наши. Видел eси, Господи, да не премолчиши; Господи, не отступи от менe. Востани, Господи, и вонми суду моему, Боже мой и Господи мой, на прю мою. Суди ми, Господи, по правде твоей, Господи Боже мой, и да не возрадуются о мне. Да не рекут в сердцах своих; благоже, благоже души нашей; ниже да рекут; пожрохом eго. Да постыдятся и посрамятся вкупе радующiися злом моим; да облекутся в студ и срам велеречующiи на мя. Да возрадуются и возвеселятся хотящiи правды моея; и да рекут выну, да возвеличится Господь, хотящiи мира рабу eго. И язык мой поучится правде твоей, весь день хвале твоей.
Псалом 35.
Глаголет пребеззаконный согрешати в себе; несть страха Божiя пред oчима eго; яко ульсти пред ним обрести беззаконiе свое, и возненавидети. Глаголы уст eго беззаконiе и лесть; не восхоте разумети eже ублажити. Беззаконiе помысли на ложи своем; предста всякому пути неблагу, о злобе же не негодова. Господи, на небеси милость твоя, и истина твоя до облак; правда твоя яко горы Божiя, судьбы твоя бездна многа; человеки и скоты спасеши, Господи. Яко умножил eси милость твою, Боже; сынове же человечестiи в крове крилу твоeю надеятися имут. Упiются от тука дому твоего, и потоком сладости твоея напоиши я. Яко у тебe источник живота, во свете твоем узрим свет. Пробави милость твою ведущым тя и правду твою правым сердцем. Да не прiидет мне нога гордыни, и рука грешнича да не подвижит мене. Тамо падоша вси делающiи беззаконiе; изриновени быша, и не возмогут стати.
Псалом 36.
Не ревнуй лукавнующым, ниже завиди творящым беззаконiе. Зане яко трава скоро изсшут, и яко зелiе злака скоро отпадут. Уповай на Господа и твори благостыню; и насели землю, и упасешися в богатстве eя. Насладися Господеви, и даст ти прошeнiя сердца твоего. Открый ко Господу путь твой и уповай на него, и той сотворит. И изведет яко свет правду твою и судбу твою яко полудне. Повинися Господеви и умоли eго. Не ревнуй спеющему в пути своем, человеку творящему законопреступленiе. Престани от гнева и остави ярость; не ревнуй, eже лукавновати, зане лукавнующiи потребятся, терпящiи же Господа, тiи наследят землю. И eще мало, и не будет грешника; и взыщеши место eго и не обрящеши. Кротцыи же наследят землю и насладятся о множестве мира. Назирает грешный праведнаго и поскрежещет нань зубы своими; Господь же посмеется eму, зане прозирает, яко прiидет день eго. Мечь извлекоша грешницы, напрягоша лук свой, низложити убога и нища, заклати правыя сердцем. Мечь их да внидет в сердца их, и луцы их да сокрушатся. Лучше малое праведнику, паче богатства грешных многа. Зане мышцы грешных сокрушатся, утверждает же праведныя Господь. Весть Господь пути непорочных, и достоянiе их в век будет. Не постыдятся во время лютое и во днех глада насытятся, яко грешницы погибнут. Врази же Господни, купно прославитися им и вознестися, изчезающе яко дым изчезоша. Заемлет грешный и не возвратит; праведный же щедрит и дает. Яко благословящiи eго наследят землю, кленущiи же eго потребятся. От Господа стопы человеку исправляются, и пути eго